Урад запэўнівае, што за два гады Беларусь амаль цалкам забяспечыць сябе памідорамі
Мяркуецца, што да 2027 года Беларусь забяспечыць уласны рынак айчыннымі таматамі на 86%, паведамляе БелТА.
Намеснік міністра сельскай гаспадаркі і харчавання Уладзімір Гракун адзначыў, што цяплічныя гаспадаркі цяпер мадэрнізуюцца, каб зменшыць залежнасць ад імпарту.
Ужо ў 2023 годзе краіна на 100% забяспечыла сябе агуркамі, а вытворчасць таматаў перавысіла запланаваны ўзровень. Да 2027 года плануецца мадэрнізаваць і пашырыць цяпліцы, што дазволіць павялічыць ураджайнасць.
«У перыяд да 2027 года застаецца мадэрнізаваць 9 гектараў пад падсвятленнем і пабудаваць 12,3 гектара новых цяпліц, — паведаміў Уладзімір Гракун. — Усе яны будуць выкарыстоўвацца для вырошчвання таматаў. У выніку да 2027 года мы цалкам забяспечым сябе агуркамі (што ўжо дасягнута) і на 86% — таматамі. Таксама вырошчваем перац, баклажаны, зеляніну, клубніцы і кветкі».
Вырошчванне гародніны ў міжсезонне з выкарыстаннем падсвятлення з’яўляецца, маўляў, дарагой, але рэнтабельнай тэхналогіяй, а дзяржава падтрымлівае сельгаспрадпрыемствы, зніжаючы для іх кошт электраэнергіі і газу.
«Дзяржаўныя прэферэнцыі даюць магчымасць гэтым прадпрыемствам працаваць з прыбыткам, — удакладніў Гракун. — Па выніках 2024 года няма ніводнага прадпрыемства з адмоўнай рэнтабельнасцю па вытворчасці гародніны (яна складае 5—6%). Дзякуючы дзяржаўнай падтрымцы кошт электраэнергіі для цяпліц ніжэйшы на 23%, а газу — на 30%. Такія захады дазваляюць забяспечыць насельніцтва сваёй прадукцыяй у міжсезонне».
Каментары