Što budzie ŭ vypadku, kali ZŠA prypynić sankcyi na biełaruski kalij i banki
Ekanamist Dźmitryj Kruk patłumačyŭ «DW Biełaruś», jak pracujuć sankcyi ZŠA suprać biełaruskich bankaŭ i «Biełaruśkalija» i što źmienicca, kali ich prypyniać.
Jakaja situacyja z bankami
Jak tłumačyć Dźmitryj Kruk, u ZŠA adzinym miechanizmam nakładańnia sankcyj jość uklučeńnie jurydyčnaj ci fizičnaj asoby ŭ tak zvany SDN-list. Heta aznačaje zabaronu dla ŭsich rezidentaŭ krainy na lubuju biznes-aktyŭnaść z asobaju z hetaha śpisu. U vypadku bankaŭ, uniasieńnie ŭ SDN-list de-fakta aznačaje adłučeńnie ad mižnarodnaj bankaŭskaj sistemy, bo jany hublajuć mahčymaść raźličvacca ŭ dalarach ZŠA.
«Takomu banku apryjory składana atrymać zapazyčańnie, vieści niejkija narmalnyja apieracyi, navat kali jany nie ŭ amierykanskim dalary. Na jaho hladziać jak na svajho rodu prakažonaha. (…) Tamu heta sapraŭdy takaja, ja b skazaŭ, paŭnavartasnaja «čornaja mietka» dla banka», — tłumačyć ekanamist.
Kruk zaŭvažaje, što z farmuloŭki, jakaja ŭtrymlivajecca ŭ artykule The New York Times, možna zrabić vysnovu ab tym, što havorka idzie nie ab poŭnaj admienie sankcyj, a ab ich časovym pasłableńni, vyklučeńni z pravił, časovym dazvole na praviadzieńnie raźlikaŭ.
Jak zaŭvažaje analityk, prypynieńnie sankcyj z boku ZŠA nie pryviadzie da źmieny isnujučaha status-kvo, bo biełaruskaja bankaŭskaja sistema z-za sankcyj ZŠA i ES stała kardynalna zaviazanaj na rasijskuju. I heta źnižaje matyvacyju bankaŭ źviartacca pa finansavańnie da zamiežnych bankaŭ i padtrymlivać ź imi adnosiny.
«Dziejničać u narmalnym pa cyvilizavanych mierkach rečyščy, heta značyć źviartacca pa finansavańnie da zamiežnych bankaŭ, padtrymlivać ź im adnosiny, razumiejučy, što ŭsio roŭna z paradku dnia pahroza sankcyj nie zdymajecca, voś hetaja matyvacyja istotna padtočanaja, jana istotna asłablena», — davodzić ekanamist.
Kruk źviartaje ŭvahu na toj fakt, što zaležnaść ad rasijskaj finansavaj sistemy nie abmiažoŭvajecca tolki zapazyčańniami.
«Biełaruskaja bankaŭskaja sistema siońnia źjaŭlajecca, hruba skažu, užo ŭsio ŭ bolšaj miery prydatkam rasijskaj. Heta značyć, usie hladziać u toj bok nie tolki pa biahučych bankaŭskich apieracyjach, a z punktu hledžańnia krynicy technałohij, praktyk i tamu padobnaje. Tamu razarvać voś hety trend zaležnaści ad Rasii časovaj zamarozkaj albo tam niejkim prypynieńniem sankcyj, sumniavajusia, što atrymajecca».
Jak adabjecca prypynieńnie sankcyj na biełaruskim kalii
Miechanizm sankcyj suprać «Biełaruśkalija» i źviazanych ź im kampanij pracuje tak ža, jak i dla bankaŭ — praz uklučeńnie ŭ SDN-list. Heta aznačaje, što ŭsie amierykanskija rezidenty nie mohuć vieści z hetymi kampanijami biznes. Pry hetym pad sankcyi traplaje ŭvieś łancuh vytvorčaści i ekspartu kaliju, uklučajučy trejdaraŭ i vytvorcaŭ.
Adnak dla niefinansavych kampanij sankcyi mienš razburalnyja, bo jany mohuć praciahvać pracu z krainami, jakija nie padtrymlivajuć sankcyi, naprykład, Kitajem ci Indyjaj. Radziej i nie ŭ poŭnaj miery ŭžyvajucca druhasnyja sankcyi (kali abmiežavańni nakładajucca na trecija krainy za supracoŭnictva z kampanijaj z SDN-lista).
Ale Kruk padkreślivaje hałoŭnuju prablemu dla «Biełaruśkalija» — stratu mahčymaści raźličvacca ŭ dalarach, što stvaraje surjoznyja ciažkaści dla finansavych apieracyj kampanii.
Prypynieńnie sankcyj budzie aznačać dazvoł na praviadzieńnie raźlikaŭ u dalarach. Praŭda, jak zaŭvažaje ekanamist, efiekt ad hetaha budzie nie taki istotny, bo značnaja častka raźlikaŭ užo pravodzicca ŭ inšych valutach, asnoŭnaja ź jakich — kitajski juań.
Kruk nie ŭpeŭnieny ŭ tym, što z prypynieńniem sankcyj źmienicca žadańnie jak kitajskaha, tak i biełaruskaha boku viarnucca da vykarystańnia amierykanskaj valuty.
Druhi važny momant: amierykanskija sankcyi suprać «Biełaruśkalija» najpierš błakujuć raźliki ŭ dalarach, ale nie ŭpłyvajuć na jeŭrapiejskija sankcyi, jakija zabaraniajuć tranzit praź ES, uklučajučy Litvu. Tamu maršruty pastavak kaliju nie źmieniacca, bo jeŭrapiejcy nie mianiajuć svaju pazicyju.
Adziny mahčymy stanoŭčy efiekt ad prypynieńnia sankcyj, jaki bačyć ekśpiert, — heta pavyšeńnie cen na biełaruski kalij. Ciapier «Biełaruśkalij» vymušany jaho pradavać amal udvaja nižej za rynkavyja.
«Kitajcy i ruskija razumiejuć, što «Biełaruśkalij» sankcyjami abkładzieny z usich bakoŭ, jaho pierahavornaja siła vielmi słabaja. Jany pa sutnaści vymušajuć jaho dempinhavać. Ceny, pa jakich «Biełaruśkalij» pradaje svaje ŭhnajeńni apošnija niekalki hadoŭ, amal u dva razy nižejšyja za rynak. Voś tut delta moža krychu skaracicca.
Razumiejučy, što pole dla manieŭru krychu pašyryłasia ŭ «Biełaruskalija», adpaviedna, jaho pierahavornaja siła krychu padrasła, mohuć vyrašać, što cisnuć na jaho takim čynam užo nie atrymlivajecca».
«Peŭnyja plusy jość, jakija možna adčuć u hrašovym ekvivalencie», — padsumoŭvaje analityk, adnak čakać, što situacyja vierniecca va ŭmoŭny 2019 hod, nie varta, bo dla hetaha niama padstaŭ.
«Ja dumaju, łohika takaja, što treba z čahości pačynać, i ŭsie razumiejuć, što situacyja zajšła ŭžo nastolki daloka, što chacia b razvarot viektara ŭ inšy bok, heta ŭžo, napeŭna, palityčny supiervažny sihnał. Pretendavać na toje, što sankcyi buduć admienienyja imhnienna i pa ŭsich frantach, heta na dadzieny momant niešta z haliny fantastyki».
Kamientary