EPAM apublikavaŭ vynikovuju finansavuju spravazdaču za 2024 hod. Dachody kampanii na fonie stabilizacyi popytu vyraśli amal na 40 miljonaŭ dalaraŭ, pieravysiŭšy samyja aptymistyčnyja prahnozy.
Sioleta EPAM čakaje dalejšaha rostu vyručki, jakaja moža stać rekordnaj za apošnija niekalki hadoŭ, piša Devby.io.
Kvartalnaja vyručka — rekordnaja za dva hady
Za minuły hod EPAM atrymaŭ 4,72 miljarda dalaraŭ vyručki — na 0,8 bolš, čym u 2023 hodzie. Da histaryčnaha rekordu 2022 hoda (tady vyručka skłała 4,82 miljarda dalaraŭ) nie chapiła 100 miljonaŭ dalaraŭ.
Na praciahu minułaha hoda kampanija pierahladała svoj prahnoz pa vyručcy z ulikam niestabilnaha klijenckaha popytu. U pryvatnaści, letam EPAM navat prahnazavaŭ vynikovaje padzieńnie vyručki. Pa vynikach treciaha kvartała kampanija zajaviła, što čakaje vynikovy dachod u miežach 4,68-4,69 miljarda dalaraŭ.
Vyručka EPAM za apošnija piać hadoŭ u miljonach dalaraŭ
Vynikovamu rostu dachodaŭ dapamoh davoli paśpiachovy čaćviorty kvartał. Za kastryčnik-śniežań EPAM atrymaŭ amal 1,25 miljarda dalaraŭ vyručki. Heta rekordny kvartalny pakazčyk za apošnija dva hady.
Vyručka EPAM u 2023-2024 hadach (miljony dalaraŭ)
Jašče ŭ listapadzie minułaha hoda finansavy dyrektar EPAM Džejsan Pietersan zajaŭlaŭ, što ŭ čaćviortym kvartale rost vyručki praciahnie stymulavać popyt u Paŭnočnaj Amierycy. Taksama jon źviartaŭ uvahu na «peŭnuju stabilnaść popytu ŭ Jeŭropie».
Taksama kampanija adznačała, što finansavy prahnoz na čaćviorty kvartał byŭ zrobleny z ulikam, u pryvatnaści, zakryćcia ŭhody pa kupli amierykanskaj hłabalnaj kansałtynhavaj kampanii Neoris.
$5+ młrd u 2025?
Pakul kampanija aptymistyčna aceńvaje svaje pierśpiektyvy ŭ biahučym hodzie. Miarkujučy sa spravazdačy, EPAM čakaje rost vyručki minimum na 10%. Kali hetyja prahnozy spraŭdziacca, to vynikovaja vyručka EPAM za hod pieravysić 5 miljardaŭ dalaraŭ.
— My praciahvajem pavialičvać tempy rostu. Miarkujem, što 2025 hod stanie hodam pierachodnaha pieryjadu, kali klijenty buduć bałansavać pamiž aryjentacyjaj na vydatki i nieabchodnaściu paskoryć praces transfarmacyi i GenAI, — zajaviŭ kiraŭnik EPAM Arkadź Dobkin.
Jon dadaŭ, što EPAM budzie praciahvać inviestavać u kamandu, pieradavyja technałohii i kansałtynhavyja mahčymaści, a taksama ŭ intehracyju kampanij, jakija byli nabytyja letaś. Heta dazvolić kampanii pavialičvać dolu rynku pa miery dalejšaj stabilizacyi popytu.
Jak adznačajecca ŭ spravazdačy, uhoda z Neoris dapamahła kampanii pašyryć prysutnaść na rynkach Paŭnočnaj Amieryki i Jeŭropy, a taksama stvaryć novyja mahčymaści dla klijentaŭ u Łacinskaj Amierycy i na ispanamoŭnych i partuhałamoŭnych rynkach.
Taksama kampanija zaviła ab zaviaršeńni ŭhody pa nabyćci kansałtynhavaj kampanii First Derivative z Paŭnočnaj Irłandyi za 300 młn dołaraŭ. «Heta dazvoliła pašyryć klijencki partfiel u śfiery finansavych pasłuh», — adznačyli ŭ EPAM.
Čysty prybytak — plus $37 miljona
Sumarny čysty prybytak EPAM pa vynikach usiaho 2024 hoda vyras amal na 9%, abo na 37,4 miljona dalaraŭ, i skłaŭ 454,5 miljona dalaraŭ.
Na čysty prybytak kampanii praciahvajuć akazvać upłyŭ kursavyja roźnicy. Za 2023 hod straty ad kursavych roźnic pieravysili 15 miljonaŭ dalaraŭ. Pa vynikach minułaha hoda sumarnaja strata ad kursavych roźnic skaraciłasia ŭ dva razy — da 7 miljonaŭ dalaraŭ.
Taksama na čystym prybytku adbilisia lhoty, atrymanyja kampanijaj ad daśledavańniaŭ i raspracovak u Polščy:
«Ilhoty dajucca ŭ adpaviednaści z polskim zakanadaŭstvam. Pradpryjemstvy mohuć pamianšać padatkaabkładanuju bazu za košt vylikaŭ pa peŭnych raschodach, uklučajučy vydatki na apłatu pracy, pry ažyćciaŭleńni inavacyjnaj dziejnaści», — zajaŭlała kampanija.
Štat supracoŭnikaŭ EPAM va ŭsich łakacyjach u śviecie (tysiač čałaviek)
Hłabalny štat — plus 15% za kvartał
Uhody pa kupli Neoris i First Derivative, a taksama inviestycyi ŭ pryciahnieńnie śpiecyjalistaŭ, u pryvatnaści, u Indyi, Zachodniaj i Centralnaj Azii, dazvolili EPAM tolki za apošni kvartał minułaha hoda pavialičyć hłabalny štat adrazu na 15%.
Na kaniec minułaha hoda hłabalnaja kamanda EPAM naličvała 61,2 tysiačy śpiecyjalistaŭ — rekord za apošnija dva hady. Štat vytvorčych śpiecyjalistaŭ EPAM za čaćviorty kvartał taksama pavialičyŭsia na 15% — ad 47,8 da 55,1 tysiačy.
Kamientary