Sapraŭdny košt DeepSeek, kitajskaha čat-botu, što abvaliŭ fondavy rynak ZŠA, akazaŭsia zusim nie takim
Śćviardžeńni raspracoŭščykaŭ kitajskaj niejrasietki DeepSeek, što jaje stvareńnie zaniało ŭsiaho dva miesiacy i abyšłosia ŭ 6 miljonaŭ dalaraŭ, istotna abvalili akcyi ŭsich bujnych zachodnich technałahičnych kampanij. Ale hety košt «kitajskaha zabojcy ChatGPT» akazaŭsia vielmi zanižanym.
Kitajski čat-bot DeepSeek, jaki pieraviarnuŭ śviet štučnaha intelektu, staŭ pradmietam detalovaha analizu ŭ novym dakładzie niezaležnaj daśledčaj kampanii SemiAnalysis.
U spravazdačy asprečvajucca śćviardžeńni raspracoŭščykaŭ DeepSeek pra košt stvareńnia i navučańnia ich madeli V3, a taksama vyličvajucca realnyja vydatki na raspracoŭku padobnaha ŠI na asnovie jak aficyjnych danych ad kitajskaj kampanii, tak i ahulnadastupnaj infarmacyi ab aktualnych cenach ekspłuatacyi anałahičnych ŠI-madelaŭ zachodnich kampanij, piša navukovy partał Interesting Engineering.
«DeepSeek pradstaviła svaju ŠI-madel V3 na biaspłatnaj asnovie i z adkrytym zychodnym kodam, zajaviŭšy, što na jaje stvareńnie i navučańnie pajšło ŭsiaho dva miesiacy i mienš jak $6 młn. Ale hetaja ličba ŭ asnoŭnym uličvaje tolki vydatki na padrychtoŭku GPU (hrafičnych pracesaraŭ), ale nie biare va ŭvahu inviestycyi ŭ daśledavańni i raspracoŭki, stvareńnie i padtrymku astatniaj infrastruktury i inšyja krytyčnyja vydatki.
Faktyčnyja vydatki DeepSeek značna bolšyja. Pa našych danych, ahulnyja kapitalnyja vydatki kitajskaj kampanii na sierviery dasiahajuć uražalnych $1,3 miljarda. Bolšaja častka hetych srodkaŭ nakiravana na ekspłuatacyju i absłuhoŭvańnie šyrokich GPU-kłastaraŭ, jakija źjaŭlajucca asnovaj vyličalnaj mahutnaści niejrasietki», — adznačajecca ŭ dakładzie SemiAnalysis.
Heta daražej za košt stvareńnia i navučańnia ChatGPT, jakoje kaštuje kala $1 miljarda. Hałoŭnaje adroźnieńnie ad kitajskaj DeepSeek u tym, što ChatGPT dla ekspłuatacyi i absłuhoŭvańnia ŭłasnych siervieraŭ vykarystoŭvaje data-centry i inšuju infrastrukturu kampanij Microsoft, Oracle i SoftBank (ale pieravažna Microsoft), u toj čas jak kitajskaja kampanija buduje i zabiaśpiečvaje svaju ŭłasnuju infrastrukturu, dadatkova sutykajučysia z nastupstvami technałahičnych sankcyj Zachadu suprać Kitaja.
DeepSeek, pavodle spravazdačy SemiAnalysis, maje dostup prykładna da 50 tysiač hrafičnych pracesaraŭ pakaleńnia Hopper ad kampanii Nvidia, siarod jakich jość mahutnyja pracesary viersij H100 i H800, a taksama H20 — śpiecyjalnaj viersii ad Nvidia dla kitajskaha rynku, raspracavanuju ŭ adkaz na abmiežavańni z boku ZŠA na technałahičny ekspart.
Dla paraŭnańnia, ChatGPT-4 (jaki byŭ vypuščany ŭ 2023 hodzie) vykarystoŭvaŭ ad 20 da 25 tysiač jašče mienš daskanałych pracesaraŭ A100 (taksama Nvidia), ale ciapier kampanija OpenAI nabližajecca da pakazčyka ŭ 100 tysiač pracesaraŭ Nvidia GB200 (lepšyja za ŭsie vyšejpieraličanyja).
Pry hetym, jak adznačaje SemiAnalysis, kitajski DeepSeek, niahledziačy na vialiki košt utrymańnia infrastruktury, demanstruje paraŭnalnyja z apošnimi viersijami ChatGPT dakładnaść adkazaŭ i mahčymaści da razvažańniaŭ. A vałodańnie ŭłasnymi siervierami moža dać DeepSeek pieravahu ŭ stabilnaści pracy jaje madeli i bolšuju hnutkaść u skaračeńni vydatkaŭ u budučyni.
Kamientary
Hala, čym kania karmić budziem?