U žycharoŭ «Minsk-Śvieta» dyjahnastavali liftafobiju. U adnym z damoŭ tvoracca vielmi dziŭnyja rečy
Skarhi žycharoŭ doma «Dubroŭnik» u ŽK «Minsk-Śviet» nahadvajuć sceny ź filmaŭ žachaŭ.
Lifty to zatrymlivajucca, to rypiać, to ruchajucca z adkrytymi dźviaryma. Pakolki adzin ź liftaŭ časta nie pracuje, a dom usio ž taki 25-paviarchovy, u hadziny pik ludziam davodzicca doŭha čakać mahčymaści spuścicca na pracu ci padniacca dadomu. Adnosna novyja kabiny i miechanizmy ŭ novabudoŭli pavodziać siabie niepradkazalna, što nie na žart pałochaje žycharoŭ. Prablema zastajecca niavyrašanaj užo nie pieršy hod, pry hetym jana nie tolki psuje niervy, ale i vyciahvaje hrošy, piša Onliner.by.
Niebiaśpiečnyja «žarty» liftaŭ
Budaŭnictva doma «Dubroŭnik» pačałosia ŭ 2019 hodzie. Mikita — adzin ź pieršych žycharoŭ, chto paśpiašaŭsia zajmieć novyja mietry. U 2022 hodzie dom narešcie zdali ŭ ekspłuatacyju, i adrazu ž pačalisia «siurpryzy».
— Pieršaja niečakanaść zaklučałasia ŭ tym, što ŭ domie ŭstalavali lifty nie Otis, jak heta było va ŭsich damach «Minsk-Cviet» i pavinna było być u nas, — kaža Mikita. — Pra heta my daviedalisia jašče na etapie budaŭnictva ad praraba. Jon skazaŭ, što Otis pad sankcyjami, tamu ich zamianili na lifty Kleemann. Što heta za lifty? My navat nie viedali, ci radavacca, ci zasmučacca.
U vyniku ŭ 25-paviarchovy dom ustalavali try lifty hreckaj firmy Kleemann: dva hruzapadymalnaściu 1000 kh, adzin — 450 kh.
— U pieršyja paŭhoda hruzavy lift nie pracavaŭ, jon byŭ adklučany, — śćviardžaje miascovy žychar. — Što datyčycca astatnich, to za dva hady ekspłuatacyi žychary doma padali mnostva zvarotaŭ z nahody ich niaspraŭnaści, a taksama 345 zajavak na techničnaje absłuhoŭvańnie.
Surazmoŭca dadaje, što hruzavy lift časta nie pracuje, i ŭsie ŭžo navat pryvykli da hetaha:
— Na 1-m paviersie ŭ pikavyja hadziny zaŭsiody źbirajucca čerhi. Tut žyvie nie mienš za 500 čałaviek, i ŭsim treba dajechać da svajho paviercha.
Nastupnaja prablema, pa słovach Mikity, — ludzi rehularna zatrymlivajucca va ŭsich troch kabinach.
— U hetym lifcie ludzi adnojčy pravalilisia na niekalki pavierchaŭ, — mužčyna pakazvaje na lift, jaki nie pracavaŭ padčas našaha vizitu. — Heta značyć, kabina rezka sarvałasia ŭniz, i jany padumali, što padajuć. Potym jana zamarudziłasia. Ludzi byli ŭ šoku!
Paźniej načalnik liftavaj słužby nas zapeŭniŭ, što heta nie było padzieńniem: lift, maŭlaŭ, u svaim rabočym režymie ekstrana spuskaŭsia na pieršy pavierch, kab skinuć abšyŭku.
Časam padčas ruchu kabina tuzajecca, spyniajučysia na paru siekund, a zatym jak ni ŭ čym nie byvała praciahvaje svoj šlach.
Miarkujučy pa videa, dzivačyć abstalavańnie časam samym niečakanym čynam. Adnojčy dźviery lifta začynilisia nie całkam, ale heta nie stała pieraškodaj dla jaho ruchu. Vyhladaje i praŭda žachliva.
Žychary skardziacca, što adbyvajucca i paraŭnalna biaskryŭdnyja dzivactvy: padčas ruchu kabiny čutnyja hruki i rypańni. Zaniepakojenyja navasielcy ŭ takich vypadkach adrazu ž vyklikajuć majstroŭ, ale, jak śćviardžajuć, huki viartajucca rehularna.
Brud, pył i paškodžańni — «piejzažy» panaramnaha lifta
Padčas aktyŭnaha zasialeńnia doma i ramontaŭ lifty byli zakrytyja abšyŭkaj ź plit OSB. U śniežni 2024 hoda, kali ramontnyja pracy skončylisia, novyja žychary vyrašyli źniać abšyŭku i ŭbačyli čarhovy «siurpryz».
— Na pieršy pohlad usio było niakiepska: vialikaje škło ŭ panaramnym lifcie cełaje (praŭda, ź inšaha boku jano było brudnaje), lusterki ŭ paradku.
Ale kali my prajechalisia ŭ panaramnym lifcie, to zaŭvažyli, što na fasadnym škleńni šmat skołaŭ, drapin i treščyn, — raspaviadaje Mikita.
Jon taksama zhadaŭ jašče adnu prablemu:
— U kanstruktyŭnych elemientach liftavaj šachty panaramnaha lifta jość defiekty i adchileńni ad dziejučych TNPA. Švy z mantažnaj pieny nie abaronieny ad razbureńnia, adsutničaje vietravaja abarona, što pryvodzić da ciepłastrataŭ i parušeńnia ŭmoŭ ekspłuatacyi lifta.
Žychary: z kišeniaŭ užo pajšło kala 34 000 rubloŭ
Na praciahu dvuch hadoŭ u domie nie było ni adnaho miesiaca, kab usie try lifty pracavali naležnym čynam.
— Absłuhoŭvajučaja arhanizacyja «Chepi Płaniet» śćviardžaje, što škło ŭ lifcie paškodžana i zabrudžana žycharami doma, tamu čyścić i adnaŭlać jaho my pavinny za svoj košt, — kaža Mikita.
Tolki za zamienu ciahovych kanataŭ z žycharoŭ było śpisana bolš za 34 000 rubloŭ. Pry hetym u momant pałomak domu jašče nie było dvuch hadoŭ, a harantyja ŭ krainie nie była admieniena. Žychary aburanyja i hatovyja dajści da suda.
«Chepi Płaniet»: «Bolšaść zbojaŭ u pracy liftaŭ vyklikana parušeńniem ekspłuatacyi»
Onlíner zapytaŭ kamientar u «Cheppi Płaniet» — absłuhoŭvajučaj arhanizacyi ŽK «Minsk-Śviet».
— Bolšaść pałomak i zbojaŭ u pracy liftaŭ vyklikana niapravilnaj ekspłuatacyjaj: niapravilnaja zahruzka budaŭničych materyjałaŭ, nieraŭnamiernaje raźmierkavańnie vahi, traplańnie śmiećcia i budaŭničaha pyłu na miechanizmy, — kaža pieršy namieśnik dyrektara Raman Mamiedaŭ.
— Čamu novyja lifty skrypiać i rypajuć?
— Heta adbyvajecca z-za nalipańnia budaŭničaha pyłu i drobnych čaścinak na nakiroŭvalnyja elemienty kabiny lifta i supraćvahu.
— Što nakont častych pałomak i zatrymak u liftach?
— Zachrasańni časta ŭźnikajuć z-za niapravilnaj ekspłuatacyi: niapravilnaje raźmierkavańnie vahi, traplańnie budaŭničaha śmiećcia i fizičny ŭpłyŭ na dźviery.
— Čamu panaramny lift tak zabrudžany?
— Paśla źniaćcia abšyŭki byli vyjaŭlenyja zabrudžvańni na źniešnim škleńni. U ciapierašni čas nakiravany zapyt u padradnuju arhanizacyju na myjku škła ŭ ramkach harantyjnych abaviazacielstvaŭ.
— Što nakont paškodžańnia škleńnia šachty panaramnaha lifta?
— Vyjaŭlenyja paškodžańni buduć likvidavany padradčykam biez pryciahnieńnia srodkaŭ žycharoŭ.
Na ciapierašni momant čakajecca praviadzieńnie kamisijnaha abśledavańnia šachty lifta i dalejšyja ramontnyja pracy.
Kamientary