Jak pracuje milicejskaja sistema videanazirańnia: pa fota znachodzić čałavieka ŭ aŭtobusie, u supiermarkiecie i ŭ škole
21.02.2025 / 9:0
Biełaruskaja milicyja zajaviła, što jaje ahulnarespublikanskaja sistema videanazirańnia zdolnaja identyfikavać čałavieka pa adnym fotazdymku i adsačyć jaho pieramiaščeńni pa ŭsioj krainie.
Manitorynhavy centr Departamienta achovy MUS. Skryn videa: ont_by / YouTube
U siužecie ANT supracoŭniki Departamienta achovy MUS prademanstravali, jak pracuje ahulnarespublikanskaja sistema videamanitorynhu. Infarmacyja z kamier videanazirańnia z usioj krainy pastupaje ŭ manitorynhavy centr u režymie realnaha času. Heta dazvalaje apieratyŭna adsočvać pieramiaščeńnie ludziej i analizavać ich pavodziny.
Na manitory bačny videafajły, na jakich zafiksavany žurnalist. Skryn videa: ont_by / YouTube
Kab prademanstravać pracu sistemy, supracoŭniki Departamienta zahruzili fatahrafiju žurnalista i atrymali zapisy z kamier pa ŭsioj krainie, dzie napiaredadni jon byŭ zafiksavany. Siarod ich byli zapisy ź videakamiery ŭ škole, adkul mužčyna zabiraŭ dzicia, supiermarkiecie na poŭdni Minska, kramie ŭ inšym horadzie krainy.
Skryn videa: ont_by / YouTube
Akramia taho, u siužecie byli prademanstravany zapisy z kamier u hramadskim transparcie, jakija taksama intehravanyja ŭ sistemu. Fiksujecca i ŭsio toje, što traplaje na milicejskija videarehistratary.
Milicyja padkreślivaje, što sistema pryznačana dla pavyšeńnia biaśpieki, ale jaje šyrokija mahčymaści vyklikajuć i pytańni nakont pryvatnaści i kantrolu za hramadzianami.
Manitorynhavy centr Departamienta achovy MUS. Skryn videa: ont_by / YouTube
U mnohich krainach prymianieńnie videanazirańnia rehulujecca strohimi zakonami, što abmiažoŭvaje vykarystańnie danych i harantuje pravy hramadzian na pryvatnaść. U Biełarusi ž takija miechanizmy kantrolu raźvivajucca biez publičnaj dyskusii, što robić jaje žycharoŭ abjektami pastajannaha nazirańnia.
Videa z kamiery nazirańnia, raźmieščanaj u hramadskim transparcie, taksama traplaje ŭ ahulnarespublikanskuju sistema videamanitorynhu. Skryn videa: ont_by / YouTube
Kožny čałaviek, jaki traplaje ŭ pole zroku kamier, moža być identyfikavany i adsočany ŭ režymie realnaha času, a jaho pieramiaščeńni zachoŭvajucca ŭ bazie danych. Heta aznačaje, što milicyja i inšyja dziaržaŭnyja struktury majuć mahčymaść u luby momant daviedacca, dzie byŭ čałaviek, u jakija miescy zachodziŭ i jak pierasoŭvaŭsia pa krainie.
Čytajcie taksama:
Navat kali schavaŭ tvar, ciabie paznajuć — źjaviłasia novaja sistema videanazirańnia
Ci zakonna vieści videanazirańnie za kvateraj, kali zdaješ jaje pasutačna?
Jak prahramy raspaznavańnia tvaru pracujuć pry našeńni maski