Пасля вяртання ў Беларусь арыштавалі Вераніку Жалубоўскую — сцюардэсу Катарскіх авіяліній, актрысу і мадэль
20.02.2025 / 21:38
Дзяўчыну абвінавачваюць ва ўдзеле ў пратэстах у 2020 годзе.
Вераніка Жалубоўская. Фота з яе старонкі «Укантакце»
Вераніцы Жалубоўскай 29 гадоў. Яна з Мінска. Скончыла мінскі ліцэй №1, а пасля адвучылася ў Мінскім дзяржаўным Лінгвістычным універсітэце, які скончыла ў 2017 годзе. Мяркуючы па анкеце, адначасова вучылася ў Беларускай дзяржаўнай акадэміі мастацтваў.
У 2016 годзе дзяўчыну прызналі пераможцай сталічнага конкурсу «ВелаМіс». Дзяўчына тады расказала, што вельмі любіць катацца, і лічыць, што ўзнагарода цалкам заслужаная.
Вераніка Жалубоўская. Фота з яе фэйсбука
Пасля сканчэння МДЛУ Вераніка адпрацавалатры гады сцюардэсай у Катарскіх авіялініях. Яшчэ адно захапленне Веранікі — мадэлінг і акцёрства. Яна знялася ў эпізадычных ролях у чатырох фільмах пад псеўданімам Вераніка Бруснікіна і супрацоўнічала з мноствам мадэльных агенцтваў.
Апошняе фота ў сацсеткі дзяўчына выклала 18 лістапада 2024 года з Турцыі. Пасля гэтага яна паехала ў Беларусь — імаверна, тады яе і затрымалі.
У тэлеграме яна даўно не з'яўлялася анлайн, а сацсеткі з лістапада неактыўныя. Імаверна, цяпер дзяўчына ў СІЗА.
Вераніка Жалубоўская. Фота з яе старонкі «Укантакце»
Суд над Веранікай Жалубоўскай пачнецца 4 сакавіка 2025 года ў судзе Фрунзенскага раёна Мінска. Судзяць яе па «народным» артыкуле — ч. 1 арт. 342 КК. Ёй пагражае да трох гадоў калоніі.
Чытайце таксама:
Што новага правяраюць у тэлефонах на мяжы пры вяртанні ў Беларусь