Марка Рубіа пагаварыў па тэлефоне з Лаўровым
15.02.2025 / 22:37
Пра размову стала вядома з паведамлення расійскага МЗС. Ведамства сцвярджае, што яна адбылася сёння па ініцыятыве амерыканскага боку.
Паводле ягоных даных, абмяркоўвалася зняцце атрыманых у спадчыну ад адміністрацыі Байдэна бар'ераў на шляху «ўзаемавыгаднага гандлёва-эканамічнага і інвестыцыйнага супрацоўніцтва».
Чыноўнікі пазначылі ўзаемны настрой на ўзаемадзеянне па Украіне, Палесціне і ў цэлым на Блізкім Усходзе.
Таксама расійскі МЗС паведаміў, што ў самы бліжэйшы час пройдзе сустрэча для ўзгаднення крокаў па ўзаемным зняцці перашкод для працы замежных прадстаўніцтваў Расіі і ЗША.
Акрамя таго, Рубіа і Лаўроў нібыта дамовіліся аб рэгулярных кантактах, у тым ліку для падрыхтоўкі расійска-амерыканскай сустрэчы на вышэйшым узроўні.
Прэс-рэліз амерыканскага боку пакуль не публікаваўся.