Zdaroŭje

Nakolki chutki vaš kišečnik? Kukuruza dapamoža heta pravieryć

Ad chutkaści ruchu ježy pa straŭnikava-kišačnym trakcie zaležyć nie tolki naša samaadčuvańnie, ale i stan zdaroŭja. Prosty chatni test dapamoža pravieryć, nakolki efiektyŭna pracuje vaša stravavalnaja sistema i ci patrabuje jana karekcyi. 

Fota: Getty Images

Zvyčajna my skancentravanyja na tym, jakuju ježu spažyvajem, adnak, jak zaŭvažajuć śpiecyjalisty, važna taksama źviartać uvahu na toje, ź jakoj chutkaściu ježa prachodzić praz straŭnikava-kišačny trakt, bo heta akazvaje značny ŭpłyŭ na samaadčuvańnie, uzrovień enierhii i navat stan imunnaj sistemy. Vydańnie The Conversation prapanuje prosty mietad pravierki chutkaści našaha kišečnika.

Jak viadoma, ruch ježy praz straŭnikava-kišačny trakt nazyvajecca matorykaj kišečnika. Na hety praces značna ŭpłyvaje mikrabijom kišečnika — tryljony karysnych bakteryj, jakija nie tolki dapamahajuć pieratraŭlivać ježu, ale i padtrymlivajuć pracu imunnaj sistemy.

Kali my jamo, to kormim nie tolki siabie, ale i hetyja bakteryi, jakija ŭ adkaz vypracoŭvajuć mietabality, što ŭzmacniajuć imunitet i padtrymlivajuć ruch ježy. Bieź ich stravavalnaja sistema pracavała b horš, što mahło b vyklikać zapory i dyskamfort.

U čym niebiaśpieka parušeńnia matoryki kišečnika

Jak adznačaje staršy navukovy supracoŭnik i viadučy bijainfarmatyk Centra vyvučeńnia mikrabijomu ŭ Oksfardskim univiersitecie Nik Iłot (Nick Ilott), čas prachodžańnia ježy praz straŭnikava-kišačny trakt varjirujecca ad 12 da 73 hadzin. U siarednim jon składaje kala 23-24 hadzin. Na chutkaść upłyvajuć hienietyka, racyjon i skład mikrabijomu.

Kali matoryka kišečnika zapavolenaja, klatčatka daŭžej zatrymlivajecca ŭ vierchnich adździełach straŭnikava-kišačnaha traktu, i bakteryi ŭ toŭstym kišečniku, jakija zvyčajna addajuć pieravahu jaje spažyvańniu, pry jaje niedachopie pieraklučajucca na pierapracoŭku białku. Heta moža pryvieści da ŭtvareńnia taksičnych hazaŭ, što vyklikaje ŭzdućcie žyvata, zapaleńnie i inšyja prablemy sa zdaroŭjem.

U niekatorych vypadkach pavolny tranzit moža pryvieści da zastoju častkova pieratraŭlenaj ježy ŭ tonkim kišečniku, što stvaraje spryjalnaje asiarodździe dla razmnažeńnia bakteryj. U vyniku moža raźvicca praźmierny rost mikraarhanizmaŭ, što vyklikaje bol u žyvacie, młosnaść i parušeńnie stravavańnia.

Kali matoryka chutkaja, ježa prachodzić praz kišečnik zanadta chutka, i arhanizm nie paśpiavaje zasvojvać dastatkovuju kolkaść vady, vitaminaŭ i minierałaŭ. Heta moža pryvieści da dyjarei, abiazvodžvańnia i niedachopu pažyŭnych rečyvaŭ. Chutkaja matoryka časta źviazanaja sa stresam, sindromam razdražnionaha kišečnika abo zapalenčymi pracesami, vyklikajučy słabaść, źniasileńnie i parušeńnie bałansu kišačnaj mikrafłory.

Fota: vecteezy.com

Test chutkaści kišečnika

Kali vy chočacie daviedacca, nakolki chutka pracuje vaš straŭnikava-kišačny trakt, Nik Iłot prapanuje prosty «test na sałodkuju kukuruzu». Reč u tym, što źniešniaja abałonka kukuruzy nie zasvojvajecca arhanizmam, tamu jana prachodzić praz uvieś straŭnikava-kišačny trakt u niaźmiennym vyhladzie i stanovicca dobra prykmietnaj u stule.

Dla pačatku treba na praciahu 7-10 dzion nie jeści kukuruzu, kab całkam ačyścić arhanizm ad jaje reštkaŭ. Paśla hetaha treba źjeści porcyju, zapisać datu i čas i sačyć za tym, kali kukuruza źjavicca ŭ stule. Kali heta adbudziecca mienš čym za 12 hadzin, to vaš kišečnik pracuje zanadta chutka. Kali spatrebiłasia bolš za 48 hadzin, matoryka kišečnika zapavolenaja.

Chacia hety mietad nie źjaŭlajecca dakładnym miedycynskim daśledavańniem, jon, jak zapeŭnivaje ekśpiert, daje vyniki, paraŭnalnyja z bolš składanymi analizami.

Kali ježa prachodzić zanadta chutka, Iłot raić źviarnucca da doktara, asabliva kali prysutničajuć takija simptomy, jak dyjareja ci abiazvodžvańnie. Kali ž čas prachodžańnia zapavoleny, ale niama dadatkovych simptomaŭ (naprykład, uzdućcia, bolu ŭ žyvacie, straty apietytu abo młosnaści), palepšyć situacyju dapamoža spažyvańnie sadaviny i harodniny (što pavialičvaje kolkaść klatčatki), dastatkovaja kolkaść vady i fizičnaja aktyŭnaść.

Ekśpiert zapeŭnivaje, što zbałansavanaje charčavańnie — kluč da zdarovaj pracy kišečnika i dobraha samaadčuvańnia.

Kamientary da artykuła