Muzyka

Patap raskazaŭ, jak daŭno jany z Naściaj Kamienskich nie vystupajuć u Rasii i čamu bolš nie budzie piesień pa-rusku

Ukrainski śpiavak i pradziusar Alaksiej Patapienka, bolš viadomy jak udzielnik dueta «Patap i Naścia», padzialiŭsia taksama, čamu jamu dazvalajuć vyjazdžać z Ukrainy i jak zapisaŭ pieśniu pa-ispansku na 170 miljonaŭ prahladaŭ.

Naścia Kamienskich i Patap. Fota: Starhit

Duet z Kijeva «Patap i Naścia» (Alaksiej Patapienka i Naścia Kamienskich) bolš za 10 hadoŭ vypuskaŭ supierchity i byŭ vielmi papularnym u Biełarusi, Ukrainie i Rasii. U 2017-m prajekt zakryŭsia, z tych časoŭ Naścia buduje solnuju karjeru i sprabuje skarać łacinaamierykanski rynak. Joj dapamahaje Patap — pradziusar i muž. 24 lutaha 2022 hoda para sustreła nie va Ukrainie i z taho času žyvie na niekalki krain, za što ich rehularna krytykujuć na radzimie.

Patap daŭ vialikaje intervju Juryju Dudziu. Pryvodzim niekatoryja cikavyja momanty.

Dzie sustreŭ pačatak vajny

24 lutaha 2022 hoda, kali pačałasia poŭnamaštabnaja vajennaja interviencyja Rasii va Ukrainu, Patap razam z Naściaj znachodziŭsia ŭ Madrydzie, tam jany zapisvali pieśniu dla novaha alboma śpiavački.

«U 5.45 ja ŭžo nie spaŭ, tamu što byŭ uvieś čas na zvankach. I tolki pieršaja rakieta patrapiła ŭ žyły dom horada Kijeva, voś z hetaj kropki kardynalna źmianiłasia žyćcio va ŭsich ukraincaŭ i ŭ mianie taksama. (…) Nie viedaŭ i nie dumaŭ, i nikoli nie mierkavaŭ, što daviadziecca pačynać žyćcio z samaha pačatku ŭ 40 hadoŭ. Kali ŭsio padličana, kali ŭ ciabie zaŭtra kancert. Usio prosta pieratvaryłasia ŭ strašny son u hety momant. (…)

Paśla hetaha paŭtara miesiaca apramietnaj ciemry, kali ty nie viedaješ, kudy biehčy i što budzie dalej. Vystupaješ, śpiavaješ, źbiraješ hrošy, pieradaješ. Broniekamizelki, armija, vałanciory, kantejniery. Žyćcio pieratvaryłasia ŭ voś takuju karusiel».

Jak adznačaje Patap, paśla pačatku vajny ŭ svajoj dziejnaści jany stali aryjentavacca vyklučna na zamiežny rynak. Ciapier, pa słovach pradziusara, z aktyŭnaściej va Ukrainie ŭ jaho zastalisia dabračynnaść i dapamoha armii.

Ci praŭda, što źjechaŭ z Ukrainy napiaredadni vajny z-za strachu

Pahałoski ab tym, što Patap z Naściaj źjechali z Ukrainy za niekalki dzion da pačatku vajny, tamu što spužalisia navin ab padrychtoŭcy napadu, muzyka nazyvaje chejtam i raskazvaje, što na praciahu lutaha niekalki raz vyjazdžaŭ z Ukrainy pa pracy. Pa słovach pradziusara, było vielmi składana arhanizavać zapis pieśni z kubinskim aŭtaram Desamieram Buena, jaki napisaŭ chity dla Enrykie Ihlesijasa.

«My vyrvali tydzień, źniali studyju ŭ Madrydzie, hatel i pajechali pracavać. Na 25-je ŭ mianie byŭ pryznačany kancert u Kijevie, i tut bem — i ŭsio. Dzicia ŭ Kijevie, ja tut, heta byŭ vielmi składany momant», — zhadvaje Patap.

Alaksiej Patapienka viadomy jak Patap. Skryn videa: vdud / YouTube

Čamu moža vyjazdžać z Ukrainy, kali mužčynam vyjezd zabaronieny

Patap praciahvaje rehularna byvać va Ukrainie, niahledziačy na toje, što mužčynam zabaroniena vyjazdžać. Tłumačyć, što kožny raz jamu davodzicca brać dazvoł na vyjezd, jaki praduhledžvaje jaho abaviazkovaje viartańnie:

«Jość sposaby, jość prahramy, ja nie viedaju, jak pravilna skazać, praduhledžanyja roznymi instancyjami, dzie ty možaš atrymać aficyjny dazvoł na vyjezd. Heta nie prosta. Treba prachodzić častku biurakratyčnuju. Ale ja za hety čas vyjazdžaŭ pa roznych pryčynach praz roznyja instancyi. Jana (prahrama. — NN) praduhledžvaje, što ja viartajusia. Tamu ja i budu viartacca. Ja vyjazdžaju na peŭny termin i viartajusia».

Pradziusar spasyłajecca na razmovu, jakaja ŭ jaho adbyłasia paśla pačatku vajny z tahačasnym hałoŭnakamandujučym Valeryjem Załužnym:

«Byli roznyja temy, a potym adbyŭsia taki baćkoŭski dyjałoh. (…) I jon taki pa-baćkoŭsku padyšoŭ, pacisnuŭ mnie ruku i skazaŭ: «Dapamahajcie frontu. Vaša zadača — dapamahać frontu ŭsim, čym možacie».

Patap tłumačyć: jon umieje zarablać muzykaj i hetym moža być karysnym.

«My za hety čas z Naściaj, z majoj žonkaj, pieradali ŭ vajennyja vałanciorskija arhanizacyi 100 miljonaŭ hryvien (kala $2,4 młn. — NN)», — dadaje pradziusar i ŭdakładniaje, što vajna dla ich pačałasia ŭ 2014 hodzie. I z taho času jany razam ź inšymi artystami naviedvali haračyja kropki, miescy dysłakacyi armii.

«Ja nie pišu na ruskaj movie. Ja sabie zabaraniŭ»

Patap zhadvaje, što ŭ 2014-m ich duet pierastaŭ vystupać u Rasii, ale całkam biznes tam zakryli ŭ 2015 hodzie:

«Reč u tym, što my ž nie prosta vystupali. U nas była kampanija, jakaja była aryjentavana na hety rynak. I my jaje pačali zhortvać, jak tolki pačałasia historyja z Krymam. Kali my zrazumieli, što heta surjozna. (…) My pačali zhortvać biznes, a heta dastatkova zajmaje času. I da 2015 hoda my całkam zharnulisia».

Ale, jak pryznajecca Patap, u 2017-m jany vystupili z adnoj pieśniaj pa asabistaj prośbie na kancercie Mieładze. Nasta Kamienskich taksama pryjazdžała dla ŭdziełu ŭ prahramie Urhanta i ŭručeńnia muzyčnaj premii.

U kastryčniku 2022 hoda Patap zajaviŭ, što «vykraśliŭ dla siabie ruskuju movu nazaŭsiody» i novych piesień ad jaho na ruskaj nie budzie.

«Ja trymaju svajo abiacańnie. Ja nie pišu na ruskaj movie. Ja mahu dać tabie intervju, ja mahu adkazać dla tvajoj aŭdytoryi i pakazać ukrainskuju pazicyju. «Słava Ukrainie». Ale ja nie pišu na ruskaj movie. Ja sabie zabaraniŭ. Heta maja pazicyja», —

zaviŭ Patap Juryju Dudziu i ŭdakładniŭ, što kamunikavać na ruskaj movie jon nie pierastaŭ.

Pra što pieśnia Naści na 170 miljonaŭ prahladaŭ

U svoj čas duet «Patap i Naścia» mieŭ na hod ad adnaho da piaci miljonaŭ dalaraŭ abarotnych srodkaŭ. Ź ich čysty prybytak składaŭ 30 pracentaŭ.

U 2017-m prajekt zakryŭsia, z tych časoŭ Naścia buduje solnuju karjeru na ispanskaj movie. Jaje samaj papularnaj pieśniaj stała Elefante, jakaja nabrała 170 miljonaŭ prahladaŭ.

Patap zhadvaje, što heta była startavaja pieśnia śpiavački dla ispanamoŭnaj aŭdytoryi. Jon imknuŭsia ŭ žartaŭlivaj maniery zakranuć temu seksu.

«Naścia prosta pryhožaja seksualnaja žančyna. Umieje pažartavać ź siabie. Zychodziačy z usiaho hetaha, ja, nie ŭmiejučy pisać i zusim nie viedajučy ispanskuju movu, u Kijevie doma [praz] Google Translate [šukaju] najlepšyja lubimyja ispanskija ličyłki. Vyjaviłasia — Un elefante, muy elegante. I hetak dalej. (…)

I ja dumaju: nu, a tut ža moža być što-niebudź takoje? Un elefante, muy elegante. Naścia, jak budzie vialiki? Largo. A jak vializny? Gigante. (…) La trompa gigante. Chobat hihancki. Heta śmiešna, heta kłasna, heta cikava. Heta asnova pieśni, mahčyma».

U vyniku na asnovie hetaj dziciačaj ličyłki Patap napisaŭ dvuchsensoŭnuju pieśniu, jakaja vybuchnuła.

Kamientary da artykuła