Ułady chočuć aŭtamatyčna śpisvać z kartki štrafy za PDR
9.02.2025 / 15:50
Spahnańnie niekatorych zapazyčanaściaŭ patrapić pad sproščanuju vykanaŭčuju vytvorčaść, paviedamiŭ ministr justycyi Jaŭhien Kavalenka.
Fota: Onliner
Ministr justycyi skazaŭ, što jaho viedamstva pracuje nad «dalejšym udaskanaleńniem» dziejnaści orhanaŭ prymusovaha vykanańnia, a taksama «ŭdaskanaleńniem zakanadaŭstva pa hetych pytańniach».
U pryvatnaści, pavodle jaho słoŭ, ciapier rychtujecca da druhoha čytańnia raspracavany Ministerstvam justycyi prajekt zakona «Ab źmianieńni zakonaŭ pa pytańniach vykanaŭčaj vytvorčaści», jakim budzie ŭviedzieny, siarod inšaha, miechanizm sproščanaj vykanaŭčaj vytvorčaści.
Taki miechanizm budzie prymianiacca, kali suma spahnańnia «niaznačnaja, da 20 bazavych vieličyń» (ciapier heta 840 rubloŭ), skazaŭ Kavalenka.
«Spahnańnie budzie ažyćciaŭlacca maksimalna apieratyŭna, biez afarmleńnia lišnich papier, z vykarystańniem roznaha rodu srodkaŭ aŭtamatyzacyi», — piša BiełTA.
U pryvatnaści, pad sproščanaje vykanaŭčaja vytvorčaść patrapić spahnańnie štrafaŭ za parušeńnie PDR, zafiksavanyja z dapamohaj sistemy fotafiksacyi.
«Heta značyć, atrymlivajecca sistema, kali ŭ aŭtamatyčnym režymie ažyćcioŭlena fiksacyja pravaparušeńnia i taksama ŭ sproščanym, u značnaj stupieni aŭtamatyčnym režymie, budzie ažyćciaŭlacca spahnańnie pa hetym pravaparušeńni šlacham śpisańnia hrašovych srodkaŭ z rachunku parušalnika», — adznačyŭ Jaŭhien Kavalenka.