Хто такая Аліса Вайдэль — кандыдатка на пасаду канцлера Германіі ад ультраправай «Альтэрнатывы»
9.12.2024 / 23:50
Выступае супраць аднаполых шлюбаў і мігрантаў, але сама жыве з жанчынай шры-ланкійскага паходжання.
Аліс Вайдэль — кандыдатка на пасаду канцлера Германіі ад ультраправай партыі «Альтэрнатыва для Германіі» (АдГ). Фота: Thomas Lohnes / Getty Images
Партыя «Альтэрнатыва для Германіі» (АдГ) упершыню ў сваёй 11-гадовай гісторыі вылучыла кандыдата на пасаду федэральнага канцлера. Ім стала 45-гадовая сустаршыня партыі Аліса Вайдэль, паведамляе Euronews.
Прымаючы намінацыю, Вайдэль адзначыла: «Наша краіна ўжо не тая, што была раней. Мы хочам зноў вывесці Германію наперад і вярнуць ёй першае месца ў свеце. Мы — другая па сіле партыя ў краіне і атрымліваем права на ўрад».
Паводле апошніх апытанняў, АдГ падтрымліваюць каля 18% выбаршчыкаў, што істотна менш, чым у кансерватыўнага блока ХДС/ХСС, які лідзіруе з 32%. Сацыял-дэмакратычная партыя Германіі (СДПГ), якая прадстаўляе цяперашняга канцлера Олафа Шольца, займае трэцяе месца.
Аліса Вайдэль у сваіх прамовах адзначала, што натхняецца былой брытанскай прэм'еркай Маргарэт Тэтчэр і што Германія павінна спыніць усе пастаўкі зброі Украіне, каб спыніць вайну.
«Мы — партыя міру. Калі вы не жадаеце вайны ў Германіі, галасуйце за АдГ», — заклікала Вайдэль.
Напярэдадні выбараў у Бундэстаг, якія маюць адбыцца ў лютым 2025 года, Вайдэль прадставіла некалькі асноўных пунктаў сваёй праграмы:
- Прасоўванне выхаду Германіі з Еўрапейскага саюза.
- Жорсткая антыміграцыйная і антыісламская палітыка.
- Падтрымка кансерватыўных і хрысціянскіх каштоўнасцяў, недапушчальнасць аднаполых шлюбаў.
Сустаршыня АдГ Аліса Вайсэль выступае ў Бундэстагу ў верасні 2024 года. Фота: Ebrahim Noroozi / AP
Нягледзячы на тое, што Вайдэль выступае супраць аднаполых шлюбаў, яна сама жыве ў Швейцарыі ў аднаполым партнёрстве з Сарай Босард, кінематаграфісткай са Шры-Ланкі. У іх ёсць двое сыноў, перадае партал The Insider са спасылкай на нямецкія медыя.
Акрамя таго, у палітычнай праграме Вайдэль фігуруюць пункты аб зніжэнні падаткаў і цэн на электраэнергію, аднаўленні вытворчасці энергіі на АЭС і вугальных электрастанцыях, а таксама аб закупках трубаправоднага газу з Расіі.
Сустаршыня АдГ таксама выказвалася за ўзмацненне палітыкі ў дачыненні да нелегальных мігрантаў, умацаванне межаў краіны і неадкладную высылку нелегалаў, замежных злачынцаў, гвалтаўнікоў і забойцаў. Вайдэль у тым ліку прапанавала прыпыніць выдаткаванне сродкаў на сацыяльную дапамогу замежнікам.
Чытайце таксама:
Ультраправая прыхільніца тэорый змоваў стане рэгуляваць урад ЗША